Астанада Қазақстан мен Ұлыбританияның құқықтық ынтымақтастығы талқыланды
6 Қазан, 2014 18:13
Қазақстан Республикасының Бас Прокуроры Асхат Дауылбаев Ұлыбританияның Әкімшілік әділеті және құқықтық саясаты бойынша мемлекеттік министрі Лорд Эдвард Фолкспен кездесуінде екіжақты құқықтық ынтымақтастықтың кең ауқымды мәселелері, оның ішінде келісім базасын және қылмыстық-құқықтық саладағы көмекті ұлғайту және нығайту мәселелері талқылады.
Тараптар өзара ықпалдастықтың қол жеткізілген деңгейіне ризашылықтарын білдірді.
«А.Дауылбаевтың айтуынша, Қазақстанның Бас прокуратурасы Ұлыбританияның құзырлы органдарымен өзара түсіністік қағидасына сәйкес қылмысқа қарсы тұру, халықаралық құқықтық көмек көрсету мәселелерін шешуде белсенді қарым-қатынас орнатқан», - делінген хабарламада.
Ол сонымен қатар қазақстандық прокуратура қызметінің басты бағыттары туралы және заңдылық пен құқықтық тәртіпті қамтамасыз ету бойынша қабылданып жатқан шаралар жөнінде сөз қозғады.
Тараптар халықаралық және аймақтық қауіпсіздікті қамтамасыз етуде қазіргі кездегі геосаяси міндеттер аясында трансұлттық қылмыспен күрес бойынша ынтымақтастықты жандандыру қажеттілігін атап өтті.
