Павлодар облысында 60 оқушы физикадан облыстық жасөспірімдер олимпиадасына қатысты

5 Қазан, 2014 12:36

Павлодар облысындағы Ы. Алтынсарин атындағы облыстық қазақ гимназия-интернатында физика пәнінен облыстық жасөспірімдер олимпиадасын өтті, деп хабарлайды «Дарын» республикалық ғылыми-тәжірибелік орталығы.

2014 жылы физика пәнінен ІV жасөспірімдер олимпиадасының іріктеу турына 184 жұмыс қабылданды. Іріктеудің нәтижесі бойынша 60 оқушы қорытынды кезеңге өтті. Олимпиаданың дәстүрлі олимпиадалардан ерекшелігі-оқушылардың жас ерекшелігіне икемделген жаңа форматта ұйымдастырылуы.

Белгіленген уақыт ішінде әр қатысушы берілген 7 есептің едәуір бөлігін орындаулары қажет. Әр орындалған тапсырманың шешімі қазылар алдында ауызша түрде қорғалады. Ең көп есептің шешімін таба білген оқушылар І, ІІ, ІІІ дәрежелі дипломдармен марапатталып, облыстық «Жалын» олимпиадалық резерв мектебіне және Қ. И. Сәтбаев атындағы Халықаралық олимпиадасына қатысады.

Облыс әкімдігі және облыстық білім беру басқармасының қолдауымен жасөспірімдер олимпиадасының жеңімпаздары мен жүлдегерлері халықаралық, аймақтық олимпиадаларға қатысуға мүмкіндік алды.

2014-2015 оқу жылындағы жасөспірімдер олимпиадасының жеңімпаздары мен жүлдегерлері күзгі демалыс уақытында Новосібір қаласындағы СУНЦ НГУ-дің базасында орналасқан оқыту-жаттықтыру мектебіне қатысады.

Барлық жаңалықтар