Қазақстандық боксшылар жазғы Азия Ойындарында 8 медаль алды

3 Қазан, 2014 19:07

Қазақстан ұлттық бокс құрамасының XVII жазғы Азия Ойындарынының ақтық жекпе-жектеріндегі қорытындысы: 6 алтын, 1 күміс және 1 қола жүлде. Бұл нәтиже – тәуелсіз Қазақстан Республикасы тарихындағы бұрын-соңды болмаған жемісті көрсеткіші, деп хабарлайды ҚР Мәдениет және спорт министрлігі.

«Ерлер құрама командасының атына алғашқы жүлдені Қайрат Ералиев 2014 жылдың 2 қазанында тіккен болатын. Жартылай финал кездесуінде Ералиев ринг иесі – кәріс спортшысы Сангминг Хамға жол беріп, Азия Ойындарының қол жүлдесін мойнына ілді», - делінген хабарламада.

Жартылай финал кездесулерінің нәтижесінде ақтық жекпе-жектерге 7 қазақстандық былғары қолғап шберелері өтіп, алтын үшін алыстарда Қазақстан намысын абыроймен қорғап шықты. Ильяс Сүлейменов, Данияр Елеусінов, Жәнібек Әлімханұлы, Әділбек Ниязымбетов, Антон Пинчук, Иван Дычко – Инчхондағы Азия Ойындарында Қазақстан әнұранын ойнатып, мемлекеттік туымызды желбіреткен боксшы батырларымыздың есімдері осы.

Сонымен қатар, отандасымыз боксышы Біржан Жақыпов континентің ең дүбірлі жарыстарының ақтық додасында өнер көрсетіп, алтын жүлдеге қол жеткізуде сәл сәтсіздікке ұшырады. Финалда Оңтүстік Кореяның спортшысы Шин Чонхунмен кездескен Біржан 2014 жылғы Азияданың күміс жүлдегері атанды.

Қазіргі кезде Республикамыздың қанжығасына жалпы саны 80, олардың ішінде 28 алтын, 21 күміс және 31 қола жүлде түсті.