Алматы мен Челябинск облыстары экономика және мәдениет саласында ынтымақтастық орнатты
2 Қазан, 2014 10:38
Атыраудағы «Көмірсутек саласындағы инновациялар» тақырыбында өткен өңіраралық XI форумда Алматы облысының әкімі Амандық Баталов пен Ресейдің Челябинск облысының губернаторы Борис Дубровский Алматы облысы мен Челябинск облысы арасында сауда-экономикалық, ғылыми-техникалық және мәдени ынтымақтастық туралы келісімге қол қойды.
«Құжат арқылы тараптар сауда, экономика, ауыл шаруашылығы, логистика, туризм, электр энергетикасы, ғылым, технология, білім және мәдениет салаларында ынтымақтастықты жүзеге асыруды мақсат етіп отыр», - деп хабарлады облыс әкімдігі.
Келісім аясындағы ынтымақтастық бірлескен бағдарламалар мен жобалар әзірлеу, өзара тәжірибе алмасу, кеңесулер, семинарлар, конференциялар секілді түрлі басқосулар өткізу, ғылыми-техникалық және өндірістік кооперация және басқа да шаралар түрінде көрініс таппақ.
