Н.Назарбаев «Менің елім. Каспийден Алтайға дейін» экспедициясы қатысушыларына сәттілік тіледі

1 Қазан, 2014 15:13

Мемлекет басшысы Ақтау қаласындағы теңіз жағалауында «Менің елім. Каспийден Алтайға дейін» этнографиялық авто-экспедициясының қатысушылармен кездесті. Олар жобаның мақсаты мен өңірлер арасындағы мәдени алмасуға үлес қоссақ деген өздерінің ұмтылыстары туралы әңгімеледі.

«Нұрсұлтан Назарбаев патриотизмді нығайтуда және елдің туристік әлеуетін дамытуда осындай бастамалардың маңызды екендігін атай отырып, экспедицияға қатысушыларға сәттілік тіледі», - деп хабарлады Ақорданың баспасөз қызметі.

Кездесуге сондай-ақ өңір жастарының өкілдері, соның ішінде Маңғыстау облысынан шыққан «Болашақ» стипендиясының түлектері, Назарбаев Университетінің тыңдаушылары, «Дипломмен ауылға» мемлекеттік бағдарламасына қатысушылар, жастар бірлестіктерінің көшбасшылары, этно-мәдени орталықтардың өкілдері, халықаралық спорт жарыстарының жеңімпаздары, мәдениет пен ғылымдағы жас қызметкерлер қатысты.

Әңгіме барысында олар өздерінің жетістіктерін ортаға салды және жастардың бастамаларын дамытуға көрсетіліп отырған мемлекеттік қолдау үшін алғыстарын білдірді.

«Менің елім. Каспийден Алтайға дейін» экспедициясы Қазақстан жастарын еліміздің сұлулығы мен өзіндік ерекшелігі туралы ортақ идеяға біріктіруге бағытталған. Оның құрамында этнограф, блогшы, журналистер мен фотографтардан құралған 20 адам бар.

Қазақстанда құрастырылған бес автомобильге мінген олар екі ай бойында республиканы аралап шығады. Оған қатысушылар экспедиция аяқталған соң фильм жасап, фотокітап шығарады.

Барлық жаңалықтар