179 мың қарияға бір жолғы материалдық көмек көрсетіледі – Өмірбаев (Брифинг бейнебаяны)

«179 мың қарияға бір жолғы материалдық көмек көрсетіледі, ол үшін шамамен 2,4 млрд теңге бөлінбек. Сонымен қатар, азаматтарды жеңіл дәрі-дәрмекпен қамтамасыз ету, қариялардың баспаналарын жөндеу, оларды отынмен қамтамасыз ету, соның ішінде ауылдық жерлердегі қарияларды басымдылыққа алу шаралары қарастырылған», - дейді А.Өмірбаев.

Сонымен қатар, оның айтуынша, 2014 жылы республика бойынша ардагерлерге әлеуметтік көмек ретінде шамамен 9,5 млрд теңге қарастырылған. «Барлық өңірлерде жергілікті атқарушы органдар қариялар мен ардагерлерді әлеуметтік қолдау шараларының жоспарын бекітті. Мониторинг нәтижесі бойынша, жалпы ардагерлер мен қарттарды әлеуметтік қолдаудың қосымша шараларына 9,5 млрд теңге қарастырылған. Бұл жергілікті бюджет қаражаты мен бизнестің әлеуметтік жауапкершілігін арттыру аясында тартылған қаражат», - дейді департамент директоры.

Оның айтуынша, қарияларды жеңілдетілген жолақымен қамтамасыз ету жоспарланған.

«40 мыңдай адамды жеңілдетілген жолақымен қамтамасыз ету жоспарланған. Мысалға, қоғамдық көліктер бойынша 1,8 млрд теңге жоспарланған, бұл шамамен 150 мыңдай адамды қамтуы керек», - дейді.

Индира Қауметова