Қазақстан жастарына ҚР Президенті Жолдауының негізгі басымдықтары түсіндірілді

30 Қыркүйек, 2014 16:13

Бүгін Л.Н. Гумилев атындағы ЕҰУ-де Елбасы Нұрсұлтан Назарбаевтың «Қазақстан жолы-2050: Бір мақсат, бір мүдде, бір болашақ» Жолдауының негізгі басымдықтары мен сарапшылық ой қалыптастыру бойынша сарапшылар тобының 1-ші отырысы өтті.Сондай-ақ, «Мәңгілік ел» ұлттық идеясын профессорлық-оқытушылық құрамның әлеуетін тарту арқылы насихаттау қаралды.

«Бүгін ЕҰУ базасында Президент Жолдауының негізгі бағыттарын түсіндіру мен оны насихаттаудың жаңа жолдарын табуға арналған кеңес өтті. Оның негізгі мақсаты жастар,студенттер мен магистранттар, докторанттарға Елбасы Жолдауының басым 7 бағытын түсіндіру, себебі қазіргі таңда біздің алдымызда жаһандық мәселе тұр, ол: 2050 жылға таман дамыған 30 елдің қатарына ену. Бүгінгі таңда жастар Жолдаудың 7 басым бағытын жете білуі керек», - деді «Халықтар достастығы» ҚҚ директоры Зиябек Қабулдинов.

Айта кетерлігі, шараға ғылыми-методологиялық сүйемелдеу жасап отырған Л.Н. Гумилев атындағы ЕҰУ әлеуметтік ғылымдар факультеті оның ішінде, философтар, дінтанушылар, педагогтар, психологтар, мәдениеттанушылар, тарихшылар, саясаттанушылар, әлеуметтанушы ұстаздар өзге ЖОО-дан шақырылды. Сарапшылық топтың кеңесін «Халықтардың достастығы» қоғамдық қоры мәдениет және спорт министрлігінің қолдауымен ұйымдастырды.

Сондай-ақ, шара аясында Елбасының Қазақстан халқына Жолдауының негізгі бағыттары туралы баяндамалар тыңдалды, сондай-ақ, кітап көрмесі мен «Мәңгі ел» халықаралық ғылыми-тарихи журналының 6-ші нөмірінің таныстырылымы өтті. Кездесу барысында дөңгелек үстелге қатысушылар Мемлекеттік елтаңба авторы Жандарбек Мәлібековпен кездесті.

Индира Кауметова

Барлық жаңалықтар