Астанада атақты ағылшын мүсіншісінің көрмесі ашылады
25 Қыркүйек, 2014 19:36
Астанада Мәдениет және спорт министрі Арыстанбек Мұхамедиұлының қатысуымен Қазақстан Республикасы Ұлттық музейінде қазіргі заманның ең әйгілі мүсіншілерінің бірі Цадок Бен-Давидтің (Zadok Ben-David, Англия, Лондон) «Түн ортасының арғы беті» атты жеке көрмесі ашылады.
Орталық Азия аумағында тұңғыш рет ұйымдастырылып отырған көрме Ұлттық музейдің Заманауи залдарында 2014 жылдың 26 қыркүйегі мен 5 желтоқсаны аралығында өтеді.
«Экспозиция 3 инсталляциядан және мүсіннен тұрады. Әрбір инсталляция суретшінің ақиқатқа айналған ойы мен қиялының көкжиегін көрсетіп, өнерсүйер қауымды бірегейлігімен таң қалдырады. Цадок Бен-Давид дүние жүзінде кең танылған және көпшілік мойындаған өзіндік көркем стилін қалыптастырған», - деп хабарлады Ұлттық музейде.
Инсталляцияларды жасау үшін суретші 10 ассистентімен бірге үш жыл тер төкті.
