Алматы қаласы ғаламдық қаржы орталықтары рейтингісінде 15 сатыға көтерілді-әкімдік

23 Қыркүйек, 2014 18:31

Алматы қаласының Өңірлік қаржы орталығы ғаламдық қаржы орталықтары рейтингісінде (GFCI) 15 саты жоғары көтеріліп, 83 халықаралық қаржы орталықтары ішінде 43-ші орынға жайғасты.

Қала әкімдігінің хабарлауынша, Алматы қаласы Шығыс Еуропа - Орталық Азия аймағында Ыстамбұл қаласынан кейін екінші орында келеді. Алматыдан кейін Прага, Варшава, Санкт-Петербор, Будапешт, Таллин және Афины қалалары орналасқан.

«Бұл жетістік Алматы қаласы үшін ерекше маңызға ие. Өйткені GFCI рейтингісі инвестициялық индустрия саласының 3 мыңнан астам мамандарынан алынған 25 мыңнан астам жауаптар негізінде құралған. Аталмыш рейтингтің басты мақсаты - әлемдегі негізгі қаржы орталықтарының бәсекеге қабілеттілігі деңгейін зерттеу. GFCI рейтингісі 83 халықаралық қаржы орталықтарының рейтингтік бағаларының мамандандырылған әдістемесі болып табылады. Оны Z/Yen Group Limited компаниясы Лондон қаласының басшылығына арнап әзірлейді», - делінген хабарламада.

Алматы қаласы алғаш рет GFCI рейтингісіне 2014 жылы наурыз айында енгізіліп, халықаралық қаржы орталықтарының ресми тізімінде 58-ші орынға жайғасқан болатын.

Барлық жаңалықтар