Әлемдік және дәстүрлі діндер көшбасшылары съезі хатшылығының отырысына 87 делегация қатысты

22 Қыркүйек, 2014 16:22

Әлемдік және дәстүрлі діндер көшбасшылары съезі хатшылығының 13-інші отырысына әлемнің 40 елінен 87 делегация қатысты. Бұл туралы бүгін Орталық коммуникациялар қызметінің брифингінде ҚР мәдениет және спорт вице-министрі Марат Әзілханов мәлімдеді.

«Біздің съезд әлемдік және дәстүрлі діндер өкілдерінің өзара келісім мен диалогтық алаңына айналып отыр. Қазақстан дегенде қазіргі таңда әлем жұртшылығының ойына ең алдымен әлемдік және дәстүрлі діндер көшбасшылары съезі оралады. Мұндай шара әлемнің ешқандай да өзге мемлекетінде ұйымдастырылмайды. Бүгінгі біздің шараға 40 мемлекеттен 87 делегация келіп отыр. Олардың арасында Патриарх Кирилл мен Ватикан өкілдері де бар», - дейді вице-министр.

Айта кету керек, Әлемдік және дәстүрлі діндер көшбасшыларының съезі алғаш рет 2003 жылы Қазақстан Республикасы Президенті Нұрсұлтан Назарбаевтың бастамасымен қолға алынған еді. 2003-2014 жылдар аралығында 13 отырыс өткізіліп, онда 2015 жылы Бесінші Съезді өкізуге байланысты мәселелер талқыланды.

Сонымен қатар, вице-министрдің айтуынша, съезд хатшылығы 2003 жылдың 23-24 қыркүйегінде Астанада өткен бірінші Әлемдік және дәстүрлі діндер көшбасшыларының съезі шешімі бойынша құрылған. Хатшылықтың қазіргі жетекшісі ҚР Парламенті Сенатының төрағасы Қасым-Жомарт Тоқаев. Хатшылыққа дін қайраткерлері мен көшбасшылары кіреді.

Индира Қауметова

Барлық жаңалықтар