Атырауда ЖИТС-тің алдын алу орталығы ашылды

Облыс әкімдігінде хабарлағандай, заманауи талаптарға сай барлық құрал-жабдықтармен жабдықталған ЖИТС-пен күрес және алдын алуға арналған типтік ғимараттың ел бойынша бірінші болып Атырау облысында ашылды.

Жаңа ғимараттың лентасын қию рәсімін облыс әкімінің орынбасары Шыңғыс Мұқан мен НКОК консорциумының Сыртқы қатынастар бойынша директоры Пьер Дельпон жасап, орталық ішімен танысып шықты.

Бұрын бір ғана серологиялық бөлімшеден құралған зертхана бірнеше соңғы үлгідегі құралдармен қамтылған. Мәселен, зертхана меңгерушісі Татьяна Меньщикованың сөзіне қарағанда, толықтай автоматтандырылған бөлімшеде халық арасында АИТВ антиденелеріне скрининг жүргізіледі.

«Сонымен қатар, гепатиттер мен ЖИТС индикаторлы инфекцияларды анықтауға мүмкіндік бар. Ал иммунология бөлімшесінде иммундық статусты анықтайтын арнайы құралдар, клиникалық биохимиялық бөлімшеде гемотологиялық анализаторлар орын алған. Мұндағы технологияның барлығы дерлік АҚШ-та жасалған», - делінген хабарламада.

 «Мысалы, біз бұрын кейбір талдауларды Ақтөбе, Оралда жасайтынбыз. Енді ауруды уақтылы анықтауға өзіміздің де мүмкіндігіміз бар», - дейді орталықтың бас директоры.