• Басты
  • Қазақстанда 6 ай ішінде 5,5 мың мүгедек жұмысқа орналасты – Нұр Отан

Қазақстанда 6 ай ішінде 5,5 мың мүгедек жұмысқа орналасты – Нұр Отан

19 Қыркүйек, 2014 18:35
«Кедергісіз келешек» жобасы шеңберінде биылғы жылдың алғашқы жартыжылдығында 5,5 мың мүмкіндігі шектеулі жан жұмысқа тұрғызылды, олардың 3 мыңға жуығы тұрақты жұмысқа орналасты.

«Нұр Отан» партиясы хабарлағандай, бүгінде партияның барлық өңірдегі қоғамдық қабылдау бөлмелеріне мәселелері мен проблемаларын айта келетін мүмкіндігі шектеулі жандар қатары артуда. Бұған дейін келіп түскен 11 мың өтініш бақылауға алынып, оның 90 пайыздан астамы оң шешім тапты.

Сонымен қатар, партия өкілдері аймақтарда инфрақұрылым нысандарының мүгедектер үшін қолжетімділігі бойынша тәуелсіз сараптамалық тексеру жүргізуде.

Әлеуметтік инфрақұрылым нысандарын тізімдеу бойынша жаңа әдістеменің жобасы әзірленді, бұл мүгедектер үшін кедергісіз орта ұйымдастыру үдерісін бақылауға мүмкіндік бермек.

«Сондай-ақ, тәуелсіз бағалауды және мүгедектер үшін жұмыс орындарын ұйымдастыру, мемлекеттік және әлеуметтік қызмет стандарттары бойынша заңнамаға ұсыныстар  әзірлеуге мүмкіндік ұсынбақ», - делінген хабарламада.

Айта кетейік, «Кедергісіз келешек» жобасының аясында мүгедектерді әлеуметтік қорғау мәселесі бойынша заңнамаға өзгертулер мен толықтырулар енгізу туралы заң жобасы әзірленді, соның ішінде 7 Кодекске және 24 заңға түзету енгізу қарастырылуда.


 

Барлық жаңалықтар