Астана мектептерінде адамгершілік сабақтары өткізіледі

«Бәйтерек» медиа орталығының хабарлауынша, Астана қалалық білім беру басқармасы қыркүйек пен қазан айларында жоғарғы сынып оқушыларына арнап барлық мектептерде түрлі пәндер мен зерттеулер, ойындар енгізбек.

 «Елорда мектептерінде адамгершілік қасиеттерге баулу мақсатында 13-14 жасар жасөспірімдерді психологиялық жетілдіретін сабақтар қолға алынбақ. Онда жанжалды жағдайларда баланың өзін өзі ұстауына, қорқынышты жеңуге, психологиялық жайлылықты сезінуге, өзіне деген сенімділікті арттыруға, оқу ұжымында өзін өзі ұстауға баулитын әдістемелер қолданылмақ», - делінген хабарламада.

Адамгершілік тәрбиелеу аясында тағы мектеп директорларына, тәрбие жұмыстары орынбасарларына, сынып жетекшілеріне «Қазіргі таңдағы адамгершілік-рухани тәрбиенің басымдылықтары», «Шәкірттердің рухани-адамгершілік тәрбиесіндегі ұстаздың орны» тақырыбында оқыту семинарлары ұйымдастырылмақ.

Сонымен қатар, қыркүйек, қазан айларында ҮЕҰ-мен бірлесіп ата-аналарға арналған «Бала тәрбиесіндегі әкімшілік жаза», «Отбасындағы толеранттылық тәрбиесі» атты тренингтер ұйымдастырылмақ.