• Басты
  • Мәскеуде ЭКСПО-2017 көрмесі таныстырылды

Мәскеуде ЭКСПО-2017 көрмесі таныстырылды

19 Қыркүйек, 2014 09:02
17-18 қыркүйек аралығында ЭКСПО-2017 комиссары – ҚР сыртқы істер министрінің бірінші орынбасары Рәпіл Жошыбаев бастаған қазақстандық делегация Ресей Федерациясына жұмыс сапарымен барды.

Комиссар РФ сыртқы істер министрі Василий  Небензеймен, РФ өнеркәсіп және сауда министрінің орынбасары Георгий Каламановпен, РФ Туризм федералды агенттігінің жетекшісі Олег Сафоновпен, Сочи-2014 қысқы Олимпиада ойындарын ұйымдастыру комитетінің экс-президенті Дмитрий Чернышенкомен, «Сколково» инновациялық орталықтың вице-президенті Александр Черновпен кездесті. Сонымен қатар, РФ Үкіметі жанындағы ресейлік өңірлердің басшыларына арналып Астана ЭКСПО-2017 халықаралық көрмесінің таныстырылымы өткізілді.

«Ресей тарабын ЭКСПО-2017 халықаралық көрмесіне дайындық барысымен таныстырдық. Көрменің ұйымдастырушылары Ресейдің аталмыш шараға белсенді ат салысуын күтеді. Ресейдің компаниялары мен ғылыми-технологиялық орталықтарының шараға қатысуына барлық жағдайды жасаймыз. РФ-ның ғылыми-инновациялық және технологиялық әлеуеті көрмеге қатысушылардың үлкен қызығушылығын тудыратын павильон құруға әбден жетеді», - деп хабарлайды ҚР СІМ.

Олег Сафонов және РФ шекаралас өңірлерінің басшыларымен кездесу барысында Р.Жошыбаев Қазақстандағы туризмді дамыту шаралары туралы айтып, ЭКСПО-2017 көрмесінің аталмыш саланы дамытуға қозғаушы күш екенін мәлімдеді.

Сонымен қатар, қазақстандық делегация «Сколково» инновациялық орталығының қызметімен танысып, орталық басшыларымен өзара ынтымақтастық құратын болып келісті.  

Барлық жаңалықтар