Алматыда Ш.Айманов туралы эссе-кітаптың тұсауы кесілді
18 Қыркүйек, 2014 19:47
«Еуразия» XI Халықаралық кинофестивалі аясында «Қазақфильм» киностудиясында КСРО халық әртісі, КСРО мен Қазақ ССР Мемлекеттік сыйлық иегері, дарынды актер, режиссер, мемлекет және қоғам қайраткері Шәкен Кенжетайұлы Аймановтың 100 жылдық мерейтойына арналған «Топжарған» атты эссе-кітаптың тұсаукесері өтті.
«Шәкен Аймановтың шығармашылығы мен өмірі алдыңғы қатарлы кинотанушылардың авторлық мақалалары мен әр жылдардың баспасөз беттеріндегі публикациялары мен замандастырының естеліктерінде көрініс тапқан», - дейді кітап авторы, Қазақстанның киноматографтары кеңесінің мүшесі, журналист Тамара Смайылова.
«Қазақфильм» АҚ баспасөз қызметінің хабарлауынша, Шәкен Аймановтың сирек фотосуреттерінен тұратын альбом да жарыққа шыққан.
Сонымен қатар, «Еуразия» кинофестивалі аясында бірқатар шаралар жоспарланған. Соның ішінде «Шәкен Айманов: адам және аңыз» атты режиссер Болат Нүсіпбековтың деректі фильмінің премьерасы мен шебердің үздік жұмыстарының ретроспективті көрсетілімі жоспарланған.
