Степногорде ТКШ жаңғырту аясында 13 үй жөнделді

«Тұрғын үй-коммуналдық шаруашылығын жаңғырту бағдарламасы бойынша Степногор  қаласында 2011 жылдан бері 13 үйге жалпы құны 175,3 млн теңгенің жөндеу жұмыстары жүргізілді. Тұрғындардың мемлекетке қаражатты қайтару көрсеткіші 97%», - деп хабарлайды облыс әкімдігі.

Ақмола облысының  әкімі Сергей Кулагин қаланың көпқабатты үйлерінің біріне барып құрылыс жұмыстарымен танысты. Аталмыш үй ТКШ жаңғырту бағдарламасы бойынша жергілікті билік тарапынан қалпына келтірілуде.

Ұзақ уақыттан бері бос тұрған бұрынғы шағын отбасылық жатақхана күрделі жөндеуден өтіп, инженерлік желілер, жеделсаты жүйесі қалпына келтіріліп, кіреберістер ретке келтірілуде. Жертөлелерде автоматты жылу пункті орнатылуда.

Степногор қалалық тұрғын үй инспекциясы бөлімінің жетекшісі Сағындық Шабаровтың айтуынша, жобаның жалпы құны 90 млн теңге. «Базис-СТ» ЖШС фирмасы тоғыз қабатты тұрғын үйді жөндеу жұмыстарымен айналысуда. Жұмыстар келер айда аяқталады деп күтілуде.