• Главная
  • Атырау облысында Хасановтар отбасы 6 асыранды баланы тәрбиелеуде
16 сентября, 2014 14:47

Атырау облысында Хасановтар отбасы 6 асыранды баланы тәрбиелеуде

Индер ауданының Есбол ауылындағы ерлі-зайыпты Асылбек Хасанов пен Қалы Ғұмарова сондай жаны жаралы балаларға құшағын ашып, өздерінің ұл-қызындай тәрбиелеп отыр.
Атырау облысында  Хасановтар отбасы 6 асыранды баланы тәрбиелеуде

«Ерлі-зайыптылар облыс орталығындағы «Ақбота» балалар үйіне келеді. О баста бір бала алуды жоспарлапты. Әрі қызына серік болады, әрі бағуға да оңай. Сөйтіп, көздері түсіп, көңілдеріне жаққан баланы қаласа, ол жалғыз емес болып шықты. Төрт ағайынды екен. Азамат, Айжан, Альфия және Азат есімді бүлдіршіндер. Бір отбасының балалары. Екеуі  төртеуін де жетелеп, үйге алып келді. Шағын отбасы бір-ақ сәтте көпбалалы шаңыраққа айналды», - деп хабарлады облыс әкімдігінде.

Содан араға он шақты жыл салып Қалы тағы ойға қалды. Балалар есейді, өз қолдары өз аузына жетті. Қазір қолғанат болып жүр. Ендеше, бұларға тағы да іні-қарындас сыйласа қайтеді?. Әсіресе, Қалының көз алдынан балалар үйінде жанарлары жәудіреп, әке-шешесн күткен сәбилер кетпей қойды. Содан былтыр қалаға келіп, Ерасыл мен Бәтиманы алып қайтты.

Міне, қазір осы балалар бір шаңырақ астында тәрбие алып, қанаттанып жатыр. Олардың татулығын, үлкенді сыйлап, кішіге қамқорлық танытуын ауылдастары жыр етіп айтады.

 «Біздің байлығымыз осылар. «Осы балаларымның бәрін тәрбиелеп, ұлды ұяға қондырып, қызды қияға ұшырсам деймін. Солардан өрбіген немере-жиендерімді бір иіскесем, арманым да болмас еді», - деп Асылбек Хасанов ағынан жарылды.