Өскемен қаласындағы 56 мүгедекке қайырымдылық акциясы аясында көмек көрсетілді

13 Қыркүйек, 2014 15:01

Алғаш рет ШҚО-да мүмкіндігі шектеулі жандарды қолдауға арналған кең ауқымды «Қамқорлық» атты қайырымдылық шарасы ұйымдастырылды. Бастаманы көтерген ШҚО орталық мешіті болса, оны облыстық әкімдік қолдады.

«Демократиялық, азаматтық қоғамда адамдар ешқандай да ерекшеліктеріне қарамастан бөлінбеуі керек. Ал денсаулығы тұрғысынан тіпті ерекшеленбеуі тиіс. Сонымен қатар сеніміне қарай да бөлінуге болмайды. Баса айта кетерлігі, аталмыш шарада ешкімнің де сенім мен діни ұстанымдарына көңіл аударылмады», - дейді ШҚО әкімі мешітте шараға қатысушылармен кездесу барысында.

Естеріңізге сала кетейік, облыстың орталық мешіті Құрбан айт мерекесінде мүмкіндігі шектеулі жандарға көмек көрсету мақсатында қайырымдылық акциясын ұйымдастырды. Осылайша ауыр еститін 15 азаматқа арнайы компьютер табысталса, мүмкіндігі шектеулі тағы 10 кісіге арба сыйланды.

Акция идеясын қолдау отырып облыс әкімдігі әлеуметтік маңызды шараның ауқымын кеңейте түсті. Акцияның соңында облыс орталығында жалпы саны 56 адамға көмек көрсетіліп, игі бастама аудан орталықтарында да жалғасын табады деп келісілді. Енді эстафета Семей қаласына табысталды.

Жалпы, Шығыс Қазақстан облысында 57 мыңдай мүмкіндігі шектеулі адамдар өсір сүріп жатыр.

Айта кету керек, аталмыш шараға Өскемен студенттерінен құралған еріктілер тобы көп көмек берді.