Астанада Татарстан Республикасы күндері аясында Сабантой мерекесі өтеді

Осыған орай Қазақстан астанасына ресми тұлғалар, іскерлік және білім беру салаларының өкілдері бастаған Татарстан делегациясы келеді.

Сапар барысында Татарстаннан келген делегация қаланың өндіріс орындарын аралап, бизнес-форум жұмысына қатысады. Сондай-ақ, қонақтар Қазақстанның татар диаспорасы өкілдерімен кездеседі.

Бұған қоса, Бейбітшілік және Келісім сарайында Татарстан өнер шеберлерінің гала-концерті өткізіліп, сол жерде фотокөрме және ұлттық қолөнер шеберлерінің көрмесі ұйымдастырылады.

Бұл күндері Астанада татарлардың ұлттық мейрамы Сабантой тойланып, шара барысында Татарстанның өндірістік және ауылшаруашылық әлеуетін көрсететін көрмелер ұйымдастырылады.

Сабантой кезінде күрестен жоғары салмақта Қазақстан чемпионаты, сондай-ақ, Қазақстан мен Татарстан командалары арасындағы матчтық кездесу өтеді. Жауыры жерге тимеген жеңімпаз балуан жеңіл көлікке ие болады.

Той барысында бұдан басқа, халықтық ойындардың 13 түрінен жарыстар өткізіледі.