Үлгілі отбасылар бақытты өмір сүрудің сырымен бөлісті

Отбасы кездесуіне оқытушылар, дәрігерлер мен сазгерлер әулеті, Қазақстан халқы Ассамблеясы мүшелері, ауыл шаруашылығы қызметкерлерінің отбасы мен асыранды балаларды тәрбиелеп отырған отбасылар өздерінің отбасылық дәстүрлерін айтып, бүгінгі таңдағы ұрпақ тәрбиесі жайлы ойларымен бөлісті.

Ақмола облысы әкімінің орынбасары Н.Нүркенов қонақтарға қарата бүгінгі кездесудің басты мақсатының үлгілі отбасылармен танысу, отбасы құндылықтарын нығайту мен ұрпақ тәрбиесіне бірлесе ат салысу екенін айтты.

«Қазақстандық отбасылардың дәрежесін арттырып, адамгершілік құндылықтарды насихаттауда қосқан үлестіріңіз үшін мол алғыс айтамыз. Сіздердің насихаттаған отбасы құндылықтары, мәдени дәстүрлер мен берік және көпбалалы отбасыларды қалыптастыруда өзіндік орындарыңыз бар. Осы мереке қарсаңында барлықтарыңыздың отбасыларыңызға татулық пен сүйіспеншілік тілеймін», - дейді әкім орынбасары.

Кездесуде бүгінгі таңда жоғалып бара жатқан құндылықтарды сақтау мен оларды насихаттау жолдары да қарастырылып, неке қасиеті дәріптелді.