«Ұлттық мұра» автошеруі Қазақстанды шарлайды

11 Қыркүйек, 2014 17:36

Кеше ҚР Ұлттық музейі «Мәдени мұра» мемлекеттік бағдарламасының 10-жылдығын атап өтуге бағытталған «Ұлттық мұра» атты І автошеруін Алматы қаласынан аттандырды.

«ҚР Ұлттық музейінің қызметкерлері аталмыш жобаны «Мәдени мұра» мемлекеттік бағдарламасын одан әрі қарай жүзеге асыру жолында музей қызметкерлерінің жұмысын біріктіру мақсатында бастаған болатын», - деп хабарлады Ұлттық музей.

Бүгінгі таңда отандық музей қызметкерлерінің алдына музей ісін дамыту мен қорларын кеңейту секілді маңызды мақсаттар қойылады.

«Ұлттық мұра» І автошеруінің саяхат бағдары оңтүстік және орталық Қазақстанның тарихи-мәдени объектілері мен облыстық музейлерін аралауды көздейді. Он күн бойы автошеру қатысушылары музей ісі саласында тәжірибе алмасып, аймақтағы музей мекемелерінің келелі мәселелері мен дамуының болашағын талқылайды. Автосаяхатшылардың пікірінше, бірегей топтамаларды зерттеу мен оңтайлы тәжірибені тарату Қазақстанның тарихи-мәдени мұрасын насихаттау қызметіне септігін тигізеді.

Автошеру аясында ҚР Ұлттық музей қорлары мәдени құндылықтарының презентациясы өткізіледі.