• Басты
  • ШҚО-да Отбасы күніне орай аула мерекесі ұйымдастырылды
11 Қыркүйек, 2014 18:29

ШҚО-да Отбасы күніне орай аула мерекесі ұйымдастырылды

Семей қаласында Отбасы күні қарсаңында белсенділер Аула күні мерекесін ұйымдастырды, деп хабарлайды ШҚО ақпараттық орталығы.
ШҚО-да Отбасы күніне орай аула мерекесі ұйымдастырылды

Шараның мақсаты - отбасы құндылықтарын қоғамның бірлігі мен татулығының негізі ретінде таныстыру, әлем мен қоршаған ортаға деген сүйіспеншілікті қалыптастырып, халық арасында сыйластықты арттыру. Мерекелік шара аясында қала тұрғындары көрші-қолаңмен танысты.

Сонымен қатар, аула күніне отбасы байқаулары мен балалардың бейнелеу өнері жарыстары ұйымдастырылып, өнерпаздар көпшілікке әнмен шашу шашты.

«Отбасы күніне орай арнайы осы Аула күнін атап өтіп жатырмыз. Бұл біздің алғашқы шара. Енді осы игі бастаманы келешекте де жалғастырып, жергілікті халықтың сыйластығын арттыру мен көрші-қолаң арасында байланысты нығайту мақсатында жұмыс істейтін боламыз. Бұл өз кезегінде бірнеше отбасының берік байланыс орнатып, қала халқының сыйластығына өз үлесін қоспақ. Өздеріңіз де білесіздер, бүгінгі таңда тіпті көпқабатты үйлердегі тұрғындар өздеріне қарама-қарсы есіктегі көршілерімен де араласпайды ғой. Бұл қоғам үшін кішігірім келеңсіздіктердің бірі деп білеміз», - дейді шараны ұйымдастырушы «Отбасы орталығы» қоғамдық қорының жетекшісі Людмила Асташкина.

Естеріңізге сала кетейік, ҚР Президентінің Қаулысына сай, қыркүйектің әрбір екінші жексенбісі Отбасы күні ретінде аталып өтіледі.

Барлық жаңалықтар