• Басты
  • С. Қайырбекова мен Франция сарапшылары Қазақстандағы денсаулық сақтау мәселесін талқылады

С. Қайырбекова мен Франция сарапшылары Қазақстандағы денсаулық сақтау мәселесін талқылады

10 Қыркүйек, 2014 11:48
ҚР Денсаулық сақтау және әлеуметтік даму бірінші вице-министрі Салидат Зекенқызы Қайырбекова Францияның Сыртқы сауда министрінің денсаулық сақтау мәселелері жөніндегі кеңесшісі, «Cellectis» компаниясының вице-президенті Давид Сурдив бастаған Франция делегациясымен кездесті.

«Кездесу барысында Қазақстанда міндетті медициналық сақтандыру жүйесін және мемлекеттік-жеке меншік әріптестікті дамыту мәселелері, сондай-ақ француз компанияларының бірлескен ынтымақтастық жөніндегі ұсыныстары талқыланды», - делінген хабарламада.

Қазақстан делегациясының басшысы қазіргі уақытта Министрлік медициналық сақтандыру жөніндегі үздік халықаралық тәжірибелерді және денсаулық сақтау саласындағы басқа да өзекті мәселелерді зерделеу бойынша жұмыстар жүргізіп жатқанын, бұл істе Еуропаның алдыңғы қатарлы мемлекеті ретінде Францияның тәжірибесі өте пайдалы болатынын атап өтті.

Қазақстан тарапы француз компанияларына денсаулық сақтау саласындағы мемлекеттік-жеке меншік әріптестікті дамытуда, оның ішінде кейіннен сенімгерлік басқаруға беру арқылы медицина мекемелерін  (емханаларды, ауруханаларды) салуға белсенді қатысуды ұсынды.

Кездесуге Гюстава Русси атындағы институттың (Франция) Бас директоры, профессор Александр Эггермонт да қатысты. Профессор Министрлік пен Гюстава Русси атындағы институттың диагностика және онкологиялық ауруларды емдеу саласындағы өзара іс-қимылды жоғары бағалады, сондай-ақ екі жақты тиімді және конструктивті ынтымақтастық дамитынына сенім білдірді.

Кездесу барысында  «Sanofi», «Airbus Group», «Oberthur Technologies» және басқа бірқатар француз компанияларының өкілдері өзара ынтымақтастықты дамыту бойынша өз ұсыныстарын білдірді. 

Барлық жаңалықтар