• Басты
  • Қарағанды облысында Ана мен баланы қорғаудың өзекті мәселелері талқыланды

Қарағанды облысында Ана мен баланы қорғаудың өзекті мәселелері талқыланды

10 Қыркүйек, 2014 11:35
Ана мен баланы қорғаудың өзекті мәселелеріне арналған жиында облыс әкімі Нұрмұхамбет Әбдібеков 2015 жылдың бюджеті жобасында перзентхана мен балалар ауруханасын қамтамасыз ету мен күрделі жөндеуден өткізу, кеңес беру көліктік қызметке арналған реанимобильдер сатып алуды қаржыландыру мүмкіндіктерін қарастыруды тапсырды.

Облыс әкімдігі хабарлағандай, өңір басшысы ана мен баланы қорғау ел Президенті Н.Назарбаевтың ерекше қадағалауындағы денсаулық сақтауды дамытудың басым бағыттарының бірі болып табылатындығын атап өтті.

«Таяуда  Мемлекет басшысының өңірге жасаған жұмыс сапары барысында Елбасы Қарағанды облысындағы нәресте өлімі деңгейінің көбейгеніне тоқталды. Сол себепті біз бүгін өңірдегі осы мәселенің асқыну себептерін анықтап, оны шешу жолдарын қарастыру  үшін  жиналып отырмыз», - деді әкім.  

Жиында болашақ аналарды ерте кезден, тіпті мектеп партасынан бастап дайындау қажеттілігі айтылды. Бұл өз кезегінде қыз балалардың денсаулықтарын жақсылап күтуінен, гигиеналық тазалыққа мән беруінен, отбасын жоспарлаудан, сырқаттардың алдын алудан бастау алу керек. Осы орайда денсаулық сақтау басқармасының білім беру басқармасымен бірлесе жұмыс істегені жөн.  

Осы сынды жұмыстарды орташа кәсіптік және жоғарғы оқу орындарында да қолға алу керек. ЖОО ректорлары мен колледж директорлары осы бағыттағы жұмысқа ат салысып, өз студенттеріне салауатты өмір салты тақырыбына арналған лекциялар ұйымдастырып, білім беру басқармасымен әріптестік құру керек.

Жиында медициналық мекемелердегі материалдық-техникалық базаның төмендігі де назардан тыс қалған жоқ. Өзге облыстардағы перинатальді орталықтармен салыстырғанда Қарағанды облысының деңгейі шамамен 58,3% құрайды. 

«Облыс әкімі қала мен аудан әкімдеріне ана өлімінің алдын алу мен нәресте өліміне жол бермеуге бағытталған шаралар жоспарын іске асыруда денсаулық сақтау басқармасына нақты жұмыстар істетуді тапсырды. Сонымен қатар, шалғайдағы ауылдарда акушер-гинеколог пен бала дәрігерін тарту жұмыстарына да серпін беру керектігі айтылды», - делінген хабарламада.

Барлық жаңалықтар