• Басты
  • «Мерейлі отбасы»: Мұнайшы Бешімовтер отбасының жалпы еңбек өтілі 777 жылды құрайды
10 Қыркүйек, 2014 15:02

«Мерейлі отбасы»: Мұнайшы Бешімовтер отбасының жалпы еңбек өтілі 777 жылды құрайды

Атырау облысы Жылыой ауданы Құлсары қаласында мұнайшылар отбасы болып табылатын Бешімовтер әулеті өмір сүреді. Әулеттің алғашқы мұнайшысы - Бешім Қызылбасов. Ол 1926 жылы тағдырдың жазуымен Қосшағыл және Төлес кен орындарының алғашқы ашылуында барып еңбек еткен ардагер мұнайшы. Оның барлық ұлдары осы кен орындарында жұмыс істеген. Ал кейін ақсақалдың немересі Науразғали Бешімов әке жолын жалғастырып ол да мұнайшы болады. Үшінші толқындағы мұнайшы болып табылатын ол бүгінде «Мерейлі отбасы» байқауының республикалық ақтық кезеңіне қатысып отыр.
«Мерейлі отбасы»: Мұнайшы Бешімовтер отбасының  жалпы еңбек өтілі 777 жылды құрайды

35 адамнан тұратын Бешімовтердің мұнай саласындағы жалпы еңбек жолы 777 жылды құрайды.

«Менің әкем бүгінгі таңда өзінің құрметті еңбек демалысында. Қазір  оның жасы 80-де. Оның өмірін бірнеше кезеңге бөліп қарастыруға болады. Оның жастық шағы ерік пен жігерге толы, елдің қызметіне арналды. Сонымен қатар, менің атам Батыс Қазақстан өңіріндегі алғашқы мұнай кен орнын ашушы ретінде де тарихта қалған. Бұл біздің ата-бабамыздың ұрпаққа мұра етіп қалдырған кәсібі. Мен қазіргі таңда осы кәсіптің қанға сіңгенін сенімді түрде айта аламын», - дейді Наурызғали Бешімовтың ұлы Асылбек Бешімов.

Айта кету керек, Наурызғали Бешімов мұнай саласында 47 жыл еңбек етті. Қазіргі таңда зейнетте. Мұнай саласының дамуына қосқан үлесі үшін бірнеше рет марапатталды. Бүгінде 2 ұл мен 2 қыз өсіріп отырған ақсақалдың қазірде 10 немересі де бар. Енді оның жолын балалары мен ер жеткен немерелері жалғастыруда.

Естеріңізге сала кетейік, «Мерейлі отбасы» байқауының республикалық кезеңінің интерактивті дауыс беруі аяқталды, енді алдағы уақытта жеңімпаздар белгілі болмақ. Байқауға Қазақстанның әр өңірінен 16 отбасы қатысуда. Дауыс беру ғаламтор, смс хабарлама  жөнелту және қоңырау шалу арқылы жүзеге асырылды. «Мерейлі отбасы» байқауы отбасы құндылықтары мен неке институтының мәртебесін көтеруді мақсат еткен тұңғыш ұлттық байқау болып табылады. Байқауға еліміздің спорт, ғылым, ұстаздық пен өзге де еңбек салаларында айтарлықтай жетістікке жеткен отбасылар қатысуда.

Индира Қауметова

Барлық жаңалықтар