Сенат Төрағасы Франция Сенатының делегациясын қабылдады
8 Қыркүйек, 2014 18:45
Қазақстан Республикасы Парламенті Сенатының Төрағасы Қасым-Жомарт Тоқаев «Франция – Орталық Азия» достық тобының төрағасы Андре Дюлэ бастаған Француз Республикасы Сенатының делегациясын қабылдады, деп Сенаттың баспасөз қызметі хабарлады.
Қазақстан Сенатының төрағасы Қазақстан мен Францияның түрлі салалардағы ынтымақтастығының қарқынды дамуына қанағаттанғандық білдірді. Парламентаралық байланыстарға қатысты Қ.Тоқаев екіжақты үнқатысуды кеңейту үшін екі елдің Парламенттерінде жұмыс істеп келе жатқан «Франция-Қазақстан» достық тобының әлеуетін белсенді дамыту қажет екенін атап өтті. Қ.Тоқаевтың пікірінше, Қазақстан мен Франция депутаттарының өзара іс-қимылының зор маңызы бар.
А.Дюлэ сондай-ақ парламенттік ынтымақтастық топтарының өзара іс-қимылының маңызды екенін атап өтіп, қазақстандық сенаторларды Францияға келуге шақырды.
Жоғарғы Палатаның басшысы француз әріптестерін еліміздің жоғары заң шығару органының қызметі және Сенатқа сайлау науқанының барысы туралы хабардар етті.
