Ертең Астанада Нейрохирургтердің азиялық конгресі ашылады

8 Қыркүйек, 2014 18:09

2014 жылдың 9-12 қыркүйегі аралығында Астанада Нейрохирургтердің Азиялық Конгресі ашылады, оны ұйымдастырушы «Қазақстандық Нейрохирургтер қауымдастығы» қоғамдық бірлестігі мен «Ұлттық нейрохирургия орталығы» АҚ Ұлттық медициналық холдингі болып табылады.

«Ұлттық нейрохирургия орталығы» АҚ баспасөз қызметінің хабарлауынша, Конгресс ТМД елдері аумағында Орта Азияда алғаш рет ұйымдастырылып отыр. Оған әлемнің 50 елінің 600 шет елдік мамандары қатысады. «Аталмыш Конгресс Азияда ғана емес, Ресей, Еуропа, Африка мен Американың нейрохирургтеріне арналған халықаралық диалогтық алаң болмақ. Шараның ұраны «Теңдессіз ғылым – теңдессіз қала. Еуразияның дәл ортасында кездесеміз!», - делінген хабарламада.

Конгресс бағдарламасы аясында заманауи неврология мен нейрохирургияның өзекті мәселелері қарастырылады. 240 баяндама тыңдалады, соның 70-і пленарлы оқылым болмақ. Сонымен қатар, 200 шақты таныстырылым мен 7 шеберлік сыныбы ұйымдастырылмақ.

Сонымен қатар, Конгресстің ұйымдасыру комитеті тарапынан азия елдерінің, соның ішінде Корея, Қытай, Малайзия, Индонезия, Иран, Ирак, Тәжікстан, Өзбекстан мен Қырғызстанның 50 жас нейрохирургтеріне қолдау көрсетіледі. «Ұлттық нейрохирургия орталығы» АҚ базасында жас мамандарға шеберлік сыныптары мен курстар өткізілмек.

Айта кету керек, Х Азия нейрохирургтер конгресі аясында III Азия нейрохирургия медбикелерінің конгресі де өтпек.