• Басты
  • Білім және ғылым министрлігі оқулықтар жетіспеушілігінің себебін түсіндірді

Білім және ғылым министрлігі оқулықтар жетіспеушілігінің себебін түсіндірді

5 Қыркүйек, 2014 17:21
Білім және ғылым министрлігінің баспасөз орталығында орта мектептердегі оқулықтардың жетіспеушілігіне байланысты брифинг болып өтті, деп ведомствода хабарлады.

Брифингте ҚР Білім және ғылым министрлігі, Мектепке дейінгі,  орта білім және ақпараттық технологиялар департаментінің директоры Жаңыл Алпамысқызы Жонтаева орта мектептерді оқулықтармен қамту ережесімен таныстырды.

ҚР Білім туралы заңының 6-бабына сәйкес, Білім және ғылым министрлігінің құзырына тек оқулықтар мен оқу-әдістемелік құралдардың бағдарламасын әзірлеу кіреді. Бекітілген бағдарлама жергілікті атқарушы органдарға жіберіледі. Жергілікті атқарушы органдар (Алматы, Астана қалалары мен облыс орталықтары) өз кезегінде баспамен келісім-шартқа отырып, аймақтарындағы мектептерді қамтамасыз етуге міндетті.

«Оқулық жетіспеушілігінің басты себебі – аймақтық білім басқармаларының Министрлікке жалған ақпарат беруінде және жаз айларында қарқын алатын урбанизация мәселесін ескермей, дұрыс болжам жасамауларында. Қазір дұрыс ақпарат бермеген білім басқармаларына жалған ақпарат үшін шара қолдану керектігін айтып, облыс, қала әкімдеріне ресми хат жаздық» деп атап өтті өз сөзінде Жаңыл Алпамысқызы.

Оқу бағдарламасына оқулықтардың жаңаруы тек 4 жылда бір рет, кезең-кезеңімен жүзеге асырылады. 2014/15 оқу жылында тек 3-ші және 10-сыныптың оқулықтары ғана жаңартылған. Басқа сыныптардың оқулықтары жаңартылған жоқ, сондықтан олар биылғы оқу жылына жарамды.

 

Барлық жаңалықтар