4 Қыркүйек, 2014 16:37

Қазақстанда балалар үйіндегі бір баланың жылдық қажетіне 1,5 млн теңге жұмсалады (Брифинг бейнебаяны)

Астанада балалар үйіндегі бір баланың қажетін толық қамтамасыз ету үшін жылына 1,5 млн теңге, айына-118 мың теңге, күніне – 4 мың теңгеге жуық қаржы жұмсалады. Бұл туралы бүгiн ҚР Президенті жанындағы ОҚК брифингi барысында ҚР БҒМ Балалар құқығын қорғау комитеті төрайымының орынбасары Мәншүк Әбдiкәрiм мәлiмдедi.

«Балалар үйіндегі бір баланың қажетін толық қамтамасыз ету үшін жылына 1,5 млн теңгеге жуық, бiр айда 118 мың және күнiне 4 мың теңгеге жуық қаржы жұмсалады. Бұл нақты сандар. Дегенмен, бұл сандар өңiрлерге байланысты өзгерiп отырады. Бiз сiздерге Астана қаласы бойынша көрсеткiштердi айтып отырмыз», - дейдi М.Әбдiкәрiм.

Айта кетейік Қазақстанда бүгiнгi күнi жетiм және ата-ана қамқорлығынсыз қалған 33 680 бала бар.

Оның iшiнде Қазақстан азаматтары 21 мыңнан аса баланы өз қорғаншылығына және қамқорлығына алған, ал 1947 бала патронаттық тәрбиеде.

Сондай-ақ, ол балаларды қайтарып беру жағдайына да тоқталып өтті.

«Балаларды қайтарып беру болып тұратын үрдіс. Балалар үйіне 10-15 бала жылына қайтарылып беріледі. Ол ата-атаналардың ауруға шалдығуы және асырап алушылардың бейімделу уақытының ауыр өтуі кезінде болады. Өткен жылы 10 бала қайта жетімдер үйіне қайтарылды. Балаларда кінә жоқ, көп жағдай ата-аналардың себебінен болып жатады. 2009-2010 жылдарда материалдық бейімделу болмаған кезде, балаларды қайтарып беру жағдайы аз тіркелді», - деді ол.

Индира Кауметова

Барлық жаңалықтар