Елбасы Қостанайдағы «ЕуразКаспианСталь» ЖШС инвестициялық жобасына барды
3 Қыркүйек, 2014 11:59
Бүгін Мемлекет басшысы Қостанай облысына жасаған жұмыс сапары барысында «ЕуразКаспианСталь» ЖШС инвестициялық жобасында болды, деп хабарлайды Ақорданың баспасөз қызметі.
"Мемлекет басшысы металды өңдеу және қайта өңдеу, арматура жасау және ұсақ сортты прокаттар шығару жөніндегі инвестициялық жобаның жүзеге асырылу барысымен танысты", - делінген хабарламада.
Қазақстан Президентіне прокат жасайтын технологиялық желінің жұмысы мен өндіріс технологиясы туралы, сондай-ақ атқарылып жатқан шаралар жөнінде баяндалды.
Сонымен қатар, Нұрсұлтан Назарбаев кәсіпорынның өндірістік цехтарын аралап көрді.
«ЕвразКаспианСталь» ЖШС-ның Қостанай прокат зауыты темірбетонды конструкцияларды арматуралауға арналған ыстық илемді болат өндіреді. Кәсіпорынның қуаты – жылына 450 мың тонна, онда 250-ден астам адам жұмыс істейді.
