• Басты
  • Білім күні Қазақстан Президенті Астанада жаңа мектеп-гимназиясын ашты

Білім күні Қазақстан Президенті Астанада жаңа мектеп-гимназиясын ашты

1 Қыркүйек, 2014 12:04
Бүгін Астанада Мемлекет басшысы Нұрсұлтан Назарбаевтың қатысуымен жаңа көппрофильді №75 мектеп-гимназиясының салтанатты ашылуы өтті.

«Бұл мектеп бірнеше жыл бұрын қолға алынған. Қазіргі таңда бұл жерде қалашық салынып отыр. Жанында ЭКСПО нысандары мен ботаникалық сад бой көтермек. Үш тілділік Қазақстанда қалыпты жағдайға айналуда. Мемлекеттік тілді игеру адамгершілік парызымыз болса, орыс тілі мен ағылшын тілінсіз өркениетке ере алмасымыз анық. Болашақтың білім мен ғылымның тілін біз игеруіміз керек», - деді Елбасы.

Мемлекет басшысының айтуынша, бүгін, білім күнінде барша Қазақстан бойынша 7600 мектепте шамамен 2 млн 600 мың оқушы мектеп партасына отыруда, соның ішінде 300 мыңы бірінші сынып оқушылары.

«Бүгінгі мерекелеріңізбен құттықтай отырып, баршаңызға бақыт пен ата-аналарға жеміс тілеймін», - деді Н.Назарбаев құттықтау сөзінде.

Елордалық әкімдіктің мәліметінше, осынау білім ордасына биыл 1313 оқушы қабылданған. Оқу ғимараты заманауи оқу құрылғыларымен, конференц-залымен, 56 интерактивті құрылғылы кабинеттермен, электронды абонетті кітапханамен қамтылған.

Мектепте оқушыларды космонавтика, медицина салаларында ғылыми-зерттеу жұмыстарын жасауға мүмкіндік беретін зертханалары мен лекция аудитоиялары, интерактивті педагогикалық және ақпараттық технологиялы орталық бар.

Айта кету керек, жаңа мектеп Жәнібек пен Керей хандар және Орынбор көшелерінің қиылысында орналасқан.

Жалпы, 1 қыркүйекте Астанада 5 мектеп ашылды. Оның әрқайсысы 1200 оқушыға арналған.

Камила Амирова

 

Барлық жаңалықтар