Н.Назарбаев Қарағанды қаласының 80 жылдығы мен Кеншілер күні мерекесіне қатысты

«Облыс орталығының орталық стадионында сөз алған Мемлекет басшысы қазақстандықтарды Конституция күнімен, ал қарағандылықтарды тағы Кеншілер күнімен құттықтады», - делінген хабарламада.

Өз сөзінде Қазақстан Президенті биылғы жылы Кеншілер күні Қарағандының 80 жылдығы аясында өткізіліп жатқанын тілге тиек етті.

«Менің Қарағанды жеріне деген махаббатым ерекше. Мұнда менің еңбек жолым мен саясаттағы қызметім басталды. Осы жерден Қазақстанның индустриялды гүлденуі бастау алады. Мен қашанда кеншілерге ерекше құрмет көрсетемін, өйткені мен кеншілер еңбегімен етене жақын таныс адаммын», - деді Елбасы.

Мемлекет басшысының айтуынша, бүгінгі таңда көмір саласы отандық индустрияның қозғаушы күшіне айналды. Ал кеншілер қазіргі кезде ерекше сұранысқа ие. Қазақстанның экономикасының қарқынды дамуы үшін біз осы салаға әбден мұқтажбыз.

Сонымен қатар Елбасы қазақстандық көмір өндірісінің негізін қалаған жандарға ерекше алғыс білдірді.

Қазақстан Президентінің айтуынша, осынау еңбектің арқасында Қарағанды бүгінгі таңда гүлдену үстінде.

«Қарағанды өңірінің кеншілер еңбегінің арқасында заманауи экономикада өзіндік орнын қалыптастырғанын көріп отырғаныма қуаныштымын. Мен қарағандылықтардың болашағының жарқын екеніне сенімдімін», - деді Н.Назарбаев.

Елбасы қарағандылықтарға әлеуметтік-экономикалық реформалар жасауда қолдау көрсеткені үшін алғыс білдіруді де ұмытпады.

Сөз соңында Мемлекет басшысы қарағандылықтардың еңбектеріне жеміс тіледі.