Бидайды форвардты жолмен сатып алу бағдарламасы аграрияларды қаржыландыруды аяқтады – ҚазАгро

27 Тамыз, 2014 13:03

«Азық-түлік келісім шарт корпорациясы» ұлттық компаниясы» АҚ ҚР екінші деңгейлі банктерінің және әлеуметтік-кәсіпкерлік корпорациялардың кепілдемесімен көктемгі-жазғы қаржыландыру арқылы ауыл шаруашылығы тауарларын өндірушілерден (АШТӨ) бидайды және/немесе арпаны форвардты жолмен сатып алу бағдарламасы бойынша аграрияларды қаржыландыруды аяқтады, деп холдингте хабарлады.

Бұдан бұрын хабарлағандай, осы бағдарламаны іске асыру үшін Экономиканы жаңғырту мәселелері жөніндегі мемлекеттік комиссияның шешіміне сәйкес бюджеттен 1 га егіс алаңына 6 000 теңге есебінен 14 млрд. теңге бөлінген болатын.

Бағдарламаның шеңберінде Азық-түлік келісім шарт корпорациясы АШТӨ-нің 13 млрд. теңгеден астам сомаға 1 738 өтінімдерін қаржыландырды. Бұл ретте аграриялар қаржыландыру үшін өтінім берген жалпы егіс алаңы 2,1 млн. га-дан асты.

Бағдарламаның қорытынды сатысы АШТӨ-нің бастапқы төлемақы сомасы көлемінің және Азық-түлік келісім шарт корпорациясының сатып алу бағасының негізінде айқындалатын бидайды және/немесе арпаны 2014 жылдың 1 желтоқсанын қоса алғандағы мерзімге дейін жеткізу арқылы аграриялардың өз міндеттемелерін орындауы болып табылады.

«Азық-түлік келісім шарт корпорациясы» ұлттық компаниясы» АҚ-ның негізгі қызметі мемлекеттік астық ресурстары мен одан қайта өңделген өнімдерді сатып алу, қалыптастыру, есепке алу, сақтауды ұйымдастыру, жаңарту, орнын ауыстыру, сатуды қамтамасыз ету, сондай-ақ Қазақстанның Үкіметі белгілеген басқа да қызметтер болып табылады. Компанияның жалғыз акционері «ҚазАгро» ұлттық басқарушы холдингі» АҚ болып табылады.

Барлық жаңалықтар