Атбасарда су тасқынынан зардап шеккен 29 отбасына жаңа пәтер берілді

Ақмола облысы әкімдігінен хабарлағандай, 29 пәтері бар тұрғын үйдің 25 - бір бөлмелі, 4 - екі бөлмелі пәтерлер. Жалпы, 125,9 млн. теңгеге құрылыс-монтаждық жұмыстар жүргізілді.

«Негізі, су тасқынынан 207 отбасы зардап шекті. Олардың 178 үйсіз қалды. Қазіргі таңда Атбасар қаласында әр қайсысында 45 пәтер бар 4 тұрғын үйдің құрылысы жүргізілуде. Жыл соңына дейін зардап шеккен отбасыларды үймен қамтамасыз ету мәселесі шешілетін болады. Жаңа үйлердің құрылысымен бірге инженерлік желілерді тарту, қазандықтарды қайта құру сынды жұмыстар қатар жүргізілуде және жаңа қазандықтар мен құбырларда сатылып алынды», - делінген хабарламада.

Әкімдіктен атап өткендей, сарапшылардың қорытындысы бойынша су тасқынынан кейін 357  үйге күрделі жөндеу жұмыстарын жүргізу қажет. Толығымен 31 үйге күрделі жөндеу жұмыстары жүргізілсе, 62 үйде олардың 90%, 264-де 30%-ы аяқталды. Ағымдағы жөндеу жұмыстары бойынша  68,5 млн теңге игерілді.