Александр Винокуров тұңғыш велосипедін бәссаудаға қояды

21 Тамыз, 2014 16:27

Александр Винокуров тұңғыш велосипеді Гранд-Виноны Бурабайдағы қайырымдылық акциясы барысында бәссаудаға қояды. Бұл туралы бүгін ҚР Мәдениет және спорт министрлігі мен «Астана» командасы арасындағы кездесуде белгілі болды.

«Биыл Бурабайда қайырымдылық жарыс осымен екінші рет ұйымдастырылғалы отыр. Өткен жылы онда мен де қатысып, өзімнің 2011 жылдан бері мініп келген велосипедімді қойған едім. Биыл өзімнің ең тұңғыш велосипедімді қоятын болдым. Ертең-арғы күндері осы қордың лотосының бірі ретінде тұратын болады», - дейді олимпиада чемпионы.

Жалпы, оның айтуынша, «Астана» командасы Тур-де-Франсқа қатысатын барлық команданың қолы қойылған сары жейдені де қоймақ.

Оның мәліметінше, ертең команда Бурабай демалыс аймағына аттанады.

«Сенбі күні Астанаға қайта ораламыз. Жексенбі күні Конституция күніне арналған велошеру өтеді. Содан кейін жігіттер ұшып кетеді, өйткені маусым аяқталды. Олардың әлем чемпионатына да қатысулары да керек», - дейді А.Винокуров.

Естеріңізге сала кетейік, 2014 жылдың 23 тамызында жыл сайынғы ірі шет елдік және қазақстандық компаниялардың топ-менеджерлер мен мемлекеттік мекеме басшылары мен БАҚ өкілдерінің қатысуымен «Rixos Borovoe» қайырымдылық велошеруі өтеді.

Шараның басты қатысушысы Олимпиада чемпионы Александр Винокуров болмақ. Шараға одан басқа 200 адам қатысады деп күтілуде.

Мадина Нұрбекова

теги:

аукцион велосипед