«Доңғалақты сөздік» мемлекеттік тілді үйренуге көмектеседі

13 Тамыз, 2014 17:31

Павлодарда «Доңғалақты сөздік» рөлінде жұмыс істейтін үш «трамвай-тілашар» жолға шықты. Сөйтіп, қоғамдық көлік қалалықтарға мемлекеттік тілді үйренуге көмектеспек. Вагондарда күнделікті қолданыстағы сөздер мен сөйлемдер қазақ және орыс тілдерінде жазылған, деп облыс әкімдігі хабарлады.

Аталмыш әлеуметтік жоба «Павлодар қаласының трамвай басқармасы» АҚ-ның бастамасы бойынша «Павлодар облысының тілдерді дамыту басқармасы» ММ-нің ақпараттық қолдауымен жүзеге асуда.

"Қазақ тілін үйрену соншалықты қиын емес, сондықтан оны кеңінен таратқымыз келеді. Сондай-ақ қарапайым әрі қажетті сөйлемдерді таңдап, жобаны пафос пен нақыл сөздерсіз-ақ жүзеге асыруды көздедік. «Туған күніңмен!», «Рақмет» немесе «Тамаша!» сияқты қарапайым сөздер мен сөйлемдерді кез келген жерде қолдануға болады", - дейді «Павлодар қаласының трамвай басқармасы» АҚ-ның вице-президенті Майра Сартаева.

Әр трамвай күніне 1000-ға жуық адам тасымалдап, трамвай паркінің жылдық жолаушылар тасымалы 20 миллион адамнан асып түсетінін ескерсек, үш вагондағы сөздер жатталып, жолаушылардың күнделікті қарым-қатынасында қолданысқа ие болмақ.

Барлық жаңалықтар