ЮНИСЕФ сарапшысы Семейдің Ювеналды сотында болды

11 Тамыз, 2014 15:18

Қазақстан Республикасы Жоғары Сотының Біріккен Ұлттар Ұйымының Балалар қорының (ЮНИСЕФ) Қазақстан Республикасындағы Өкілдігінің ынтымақтастығы аясында кәмелетке толмағандардың істері жөніндегі соттардың қазақстандық моделін бағалау, олардың дамуын, нәтижесін жинақталған тәжірибені құжаттандыру бойынша жоба жүзеге асырылмақ.

Ведомствода хабарлағандай, құжаттандыру мен талдау жасау мақсатында жоспарланған ЮНИСЕФ-тің ұлттық сарапшылары тобымен кәмелетке толмағандардың істері жөніндегі мамандандырылған ауданаралық соттарында сот процесстерін бақылау, мағлұматтар жинау, соттарда интервью алу шараларын орындау үшін Шығыс Қазақстан облысының №2 кәмелетке толмағандардың істері жөніндегі мамандандырылған ауданаралық сотына қазақстандық сарапшы Даулет Жакаев келді. Іс-сапар барысында сарапшы Д. Жакаев соттың материалдық-техникалық базасымен танысып, сот төрағасы Р.Кусаиновпен, судьяларымен сұхбаттасты.

Сарапшылар іс-әрекетінің қорытындысы бойынша шолулар жасалып, ол Қазақстан Республикасының Жоғары Соты ЮНИСЕФ-пен бірігіп Астана қаласында осы жылдың қазан айында өткізетін «БҰҰ-ның балалар құқығы туралы Конвенциясының Қазақстан Республикасындағы 20 жылдығы: балалар мен отбасылардың сот төрелігіне қол жетімдігі» атты халықаралық конференциясында ұсынылатынын атап өту қажет.

Барлық жаңалықтар