Жоғарғы сот: 5 ай ішінде сот органдарының байланыс орталығына 3 мыңнан астам қоңырау шалынды
9 Тамыз, 2014 14:28
Бірыңғай байланыс орталығы жұмысын бастағалы бері (2014 жылғы сәуір) барлығы 3 мыңнан астам телефон қоңырауы келіп түсті, деп Жоғарғы соттың баспасөз қызметі хабарлады.
Байланыс орталығы сот ісін жүргізу мәселелері бойынша тұрғындарды жедел ақпараттандыру мақсатында құрылды. Кез келген азамат 1401 республика бойынша бірыңғай телефон нөміріне хабарласып, өз сұрағын қоя алады. Орталық жұмыс уақытында қолжетімді болып табылады.
Байланыс орталығының арқасында азаматтар мен заңды тұлғалардың өкілдері соттардың жұмысы бойынша анықтамалық және сот актілеріне шағымдану тәртібі, істі қарау нәтижесі, істі және сот тыңдауының қайта қарауға өтініш түсірілген күн туралы мәліметтерді біле алады.
Бұған қоса, байланыс орталығының қызметкерлері сот органдарының Бірыңғай автоматтандырылған ақпараттық-талдамалық жүйесінің жұмыс әдісін, сондай-ақ Жоғарғы Сот басшылығының жеке қабылдауына жазылу тәртібін түсіндіреді.
