• Басты
  • Италия сарапшысы 25 қазақстандық маманға психомоторика бойынша дәріс береді

Италия сарапшысы 25 қазақстандық маманға психомоторика бойынша дәріс береді

7 Тамыз, 2014 14:47
Алматыда «Даму мүмкіндігі шектеулі балаларды кешенді сауықтыру барысында психомоторика әдістерін қолдану» атты үш күндік семинар өз жұмысын бастады. Семинарды жүргізуге әдіскер ретінде осы саладағы ең белді мамандардың бірі, Италиядағы психология және психомоторика саласындағы зерттеу орталығының жетекшісі Франко Баскаини шақырылды.

Семинар  Қазақстанда инклюзивті қоғам қалыптастыру жобасының аясында «Самұрық-Қазына» ұлттық әл-ауқат   қоры» АҚ-ның қаржылық қолдауымен өткізілуде.

Семинар барысында түрлі аймақтардан келген 25 маман дайындықтан өтеді. Олар «Кеңес» сауықтыру орталығында бірнеше жылдан бері  қолданылып келе жатқан бірегей авторлық сауықтыру бағдарламасымен танысады.

Психомоторика бөлімшесінде емделіп жатқан балалармен жұмыс істеп, теориялық білімдерін іс жүзінде бекіте алады. Дайындықтан өткен мамандар биылдан бастап  Қазақстанда инклюзивті қоғам қалыптастыруға арналған жоба аясында Астана, Қарағанды, Көкшетау, Ақтөбе қалаларында ашылатын коррекциялық кабинеттерде жұмысқа кіріседі.

Бұл кабинеттер жыл сайын 1500-ге тарта мүмкіндігі шектеулі балаларға қызмет көрсетуге есептелген. Мамандар жұмыс барысында семинарда меңгерген психомоторика әдістерін кеңінен қолданбақ.

Аталмыш ғылым саласының жетістіктері  әлемнің көптеген елдерінде аутизм, тілінің мүкісі бар немесе психикалық дамуы тежелген балаларды сауықтыру әдісі ретінде кең қолданыс тапқан. Қазіргі таңда Қазақстанда мүмкіндігі шектеулі балалардың жалпы саны 138 мыңнан асады.

«Инклюзивті қоғам қалыптастыру жобасының мақсаты  - денсаулығында мүкісі бар балалардың басқа қатарларымен бірге жалпы орта білім беретін мектептерде оқып, қоғамда өз орнын табуына көмектесу», - деп шараны  ұйымдастырушылар хабарлады.

Айта кетейік, шараны «Дара» қайырымдылық қоры мен «Кеңес»  мүмкіндігі шектеулі балаларды кешенді сауықтыру орталығы ұйымдастырды. 

Барлық жаңалықтар