• Басты
  • Атырауда ТКШ және құрылыстағы энерготиімділікке қатысты семинар өтті
5 Тамыз, 2014 12:51

Атырауда ТКШ және құрылыстағы энерготиімділікке қатысты семинар өтті

Атырауда басталған «Аймақтардың бәсекеге қабілеттіліктерін және өмір сапасын жақсарту үшін тұрғын үй-коммуналдық шаруашылық, құрылыс және жарықтандырудағы энерготиімділік» тақырыбындағы екі күндік семинар жетпістен астам сарапшының басын қосты, деп облыс әкімдігінде хабарлады.
Атырауда ТКШ және құрылыстағы энерготиімділікке қатысты семинар өтті

Семинар барысында БҰҰ Даму бағдарламасы Ғаламдық экологиялық қор (БҰҰДБ/ҒЭҚ) жобасының сарапшылары жылумен қамтамасыз етудегі энерготиімділіктің экономикалық және экологиялық артықшылықтары, облыстың елді мекендеріне энерготиімді технологияларды енгізу, ғимараттардағы нормативтік талаптар, құрамында сынабы бар шамдарды кәдеге жарату және тағы басқа мәселелерді ортаға салып талқылады, пікір алмасты. 

Ұйымдастырушылардың айтуынша, БҰҰ Даму бағдарламасының негізгі міндеті – елдердің дағдарысқа қарсы төтеп беруін арттыру және қоғамның барлық топтарының өкілдерімен ынтымақтасу. «Энергияны үнемдеу – бүгінгі таңдағы басты талаптардың бірі. Осыған орай облыс бойынша жүзден астам шараны қамтитын кешенді жоспар жасақталды. Биылғы алты ай қорытындысымен сол іс-шаралардың 66-сы орындалды. Қалғаны жылдың соңына дейін жүзеге асатын болады.

Бұл, ең алдымен, қомақты бюджеттік қаржыны үнемдеуге септігін тигізеді. Соңғы екі-үш жылда энергия үнемдейтін құрал-жабдықтарды орнату арқылы бюджеттің 100 миллион теңгедей қаржысын үнемдедік. Осы орайда, біз облыстағы барлық мекемелерге ұсыныстар мен тапсырмалар берудеміз», - дейді семинарға қатысқан облыс әкімінің орынбасары Сәлімжан Нақпаев. 

Ал, семинарды ұйымдастырушы – жоба жетекшісі Сырым Нұрғалиев энергияны үнемдеуге халықтың да оң көзқарас білдіре бастағандығын айтты. Энергияны үнемдейтін құрамында сынабы бар шамдарды үй маңдарындағы қоқыс жәшіктеріне, далаға лақтыруға болмайтыны белгілі. 
 

 

Барлық жаңалықтар