Қазақстан мен Ресей кеденшілері посткедендік бақылаудың тиімділігін талқылады

1 Тамыз, 2014 18:17

Ақтөбе қаласында Қазақстан Республикасы Қаржы министрлігі Кедендік бақылау комитеті мен Ресей Федералды кеден қызметі Приволжск кеден басқармасының (РФ ФКҚ) қызметкерлерінің жұмыс кездесуі өтті, деп ҚР КБК баспасөз қызметі хабарлады.

Кездесу барысында тауарларды шығарғаннан кейінгі кедендік бақылауды (посткедендік бақылау) жүзеге асыру және қызметтің аталған бағыты бойынша жұмыс нәтижелерімен танысу жөніндегі практикалық тәжірибемен алмасу болды.

Кедендік құн туралы нақты мәліметтерді бақылау, Ресей Федерациясының кеден органдары қалыптастырып, қолданатын кедендік тазарту сатысындағы тауарларды жіктеудің дұрыстығы мәселері бойынша мақсатты тәуекел профильдерін қалыптастыру практикасына ерекше назар аударылды.

Тараптар тәуекел деңгейі төмен адал ниетті сыртқы экономикалық қызметке қатысушыларға қатысты тексеру шараларын ұйымдастырудың және қызметіне мониторинг жүргізудің ерекшеліктері, аталған санаттағы тұлғаларға қатысты тәуекелдерді азайту бойынша «ақ сектор» деп аталатын жекелеген шараларды қолданбау мәселелері талқыланды.

Екі жақты кездесу нәтижесі бойынша посткедендік бақылау тиімділігін арттыруға ықпал ететін осындай іс-шараларды өткізудің маңыздылығы ескерілді.