Оралда өткен бос орындар жәрмеңкесінде 66 адам жұмыспен қамтылды

Аталған шараға 20 жұмыс беруші мекемелер мен кәсіпорындардан әр түрлі салалар мен «Дипломмен ауылға» бағдарламасы бойынша барлығы 300-ге жуық бос жұмыс орындары ұсынылды.

Шараға қатысқан 380 жұмыс іздеуші жұмыс беруші мекемелер мен кәсіпорындар өкілдерімен жеке әнгімелесулер өткізіп, тиісті мамандықтар бойынша 282 түйіндеме қабылданды.

Жәрмеңке барысында Орал қалалық жұмыспен қамту және жастармен жұмыс жөніндегі ресурстық орталықтарының кеңесшілері «Жұмыспен қамту-2020», «Жастар тәжірибесі», «Кәсіби даярлау, қайта даярлау және қайта оқыту», «Әлеуметтік жұмыс орындары», және «Дипломмен ауылға» мемлекеттік бағдарламалары бойынша 73 қатысушыға толық ақпарат берді.

Жәрмеңкенің толықтай қорытындысы тамыз айының бірінші он күндігінде нақтыланады. Ал жәрмеңке барысында 66 жас тұрақты жұмысқа орналасуға жолдама алды.