Бүгін Мемлекет басшысы алғашқы "Қазақ" елі сабағын өткізді

3 Қыркүйек, 2013 00:00

Бүгін Республика Президенті Н. Назарбаев Астана қаласындағы №64 мектеп-лицейде елорда мектептерінің үздік әрі белсенді шәкірттерімен жүздесіп, оларға елімізде биылдан бастап сабақ кестесіне енген «Қазақ елі» пәнін жүргізді. «Жаңа қазақстандық патриотизм» тақырыбында өткен алғашқы сабаққа №64, №15 және №6 білім ордаларының 22 он бірінші сынып оқушылары қатысты. Бұл жөнінде Baq.kz тілшісі хабарлайды.

Кездесу барысында оқушылар Мемлекет басшысымен патриотизм туралы ойларымен бөлісіп, пікір алмасты. Ал Нұрсұлтан Әбішұлы өз кезегінде жаңа қазақстандық патриотизмнің қалыптасуы жайлы әңгіме қозғап, өзінің «Қазақстан – 2050» Стратегиясы: жетілген мемлекеттің жаңа саяси бағыты» туралы Жолдауы мен осындай негізгі құндылықтардың бірлігі мен мәдени мұраны сақтаудағы маңыздылығын айтып берді.

- Тәуелсіздік бізге оңай келген жоқ. Біздің болашағымыз өз қолдарыңда екенін ескеріп, сендер білімді, жан-жақты қабілетті, талантты, дарынды болып өсіп-жетілулерің үшін барынша жағдай жасап жатырмыз. Бұл әке-шешелерің мен ата-әжелеріңнің ақ адал, маңдай терінің нәтижесі. Мемлекеттің үздіксіз қолдауының жемісі. Миллиондаған еңбеккерлер мен ел азаматтарының зор сенімінің үлгісі десек те болады. Мысал үшін айта кетейік, күні кеше ғана 1 200 орынға арналған №71 мектеп ашылды. Сондай-ақ, жыл соңына қарай 2 300 орынға арналған 2 мектептің құрылысын аяқтау жоспарланып отыр. Бұдан басқа 6 000 орынға лайықталған 5 мектеп құрылысы салынуда. Бұл ғимараттар келер жылы пайдалануға беріледі деп күтілуде. Жалпы, Астана қаласында білім беру жүйесінің бюджеті 2,8 есе – 7,2-ден 19,8 млрд теңгеге өскен. Осының негізінде мұнда білім беру нысандары жылдан жылға артып келеді. Саралай қарасақ, осындай жағдай жасаған кезең елімізде бұрын-соңды болмаған екен. Ендеше, мүмкіндікті қалт жібермей сәтті пайдаланбау сендерге үлкен сын болмақ, - деді Мемлекет басшысы шәкірттерге қарата.

Барлық жаңалықтар