Жарты жылда құтқарушылар 770-тен астам адамның өмірін құтқарды – В.Божко
17 Шілде, 2014 16:44
Жыл басынан берісу қоймаларындағы су-құтқару қызмет құтқарушылары 770-тен астам адамның, соның ішінде 150 баланың өмірін құтқарды. Бұл туралы бүгін ҚР Президенті жанындағы Орталық коммуникациялар қызметінің брифингінде төтенше жағдайлар министрі В.Божко мәлімдеді.
«Жыл басынан бері суда құтқару қызметтерінің құтқарушылары су қоймаларынан 772 адамды, оның ішінде 159 баланы құтқарды. 11 мыңнан астам су қоймалары тексеріліп, суға шомылуға арналған 480 демалыс орны белгіленді. Бұл орындарда судың түбін қауіпті заттардан тазарту жұмыстары жүргізілді»,- деді министр.
Оның айтуынша, жыл басынан бері 291 адам суға кеткен, оның 81-і - балалар. Судағы қайғылы оқиғалар адамдардың күші мен мүмкіндіктерін асыра бағалауы, қауіпсіздіктің қарапайы ережелерін сақтамауы, сондай-ақ азаматтардың суға мас күйінде шомылуы салдарынан болып жатады.
Сонымен қатар соңғы екі жылда 25 мың баламен оқыту шаралары жүргізіліп, соның ішінде 3 мың балалар үйінің тәрбиеленушілері тартылған.
Индира Қауметова
