Ферроқорытпа зауытындағы инновация үдемелі индустриалды дамудың жарқын үлгісі

«Елімізде инновациялық өндірісті бір жолға салу үшін жұмыстар жүргізілуде. Осы ретте жақында ғана Елбасы өз қолымен жан бітірген ферроқорытпа зауытындағы инновация Қазақстандағы үдемелі индустриалды дамудың жарқын үлгісі бола алады. Мұнда заманауи үлгідегі пеш орнатылды», - деп А. Жаңабаев ағынан жарылды.

Жалпы, тағы да дәл осындай үш пеш орнатылатын болады.  Осы ретте цехтың өнімділігі жылына  440 мың тонна  жоғары сапалы феррохромды құрайды. Бүгінде құрылыс жұмыстарына 843 млн-ға жуық  доллар инвестицияланды.

«Айта кетерлік жайт, бұл жаңа пештер әлемдегі бірде бір елде жоқ. Олардың қуаттылығы, өнімділігі және өндірісті автоматтандыру деңгейі өте жоғары», - деп мыс балқытушы атап өтті.

Цехтың құрылысы барысында зауыт мамандары әлемнің үздік кәсіпорындарында өз біліктіліктерін жетілдіріп, іс-тәжірибеден өтті. Сонымен қатар, жұмыс істеп отырған ескі зауыттанда тәжірибесі мол металлург мамандар жіберілді.

«Мен, бастапқыда № 1 цехта балқытушы болып жұмыс істедім. Кейін білімімді жетілдірген соң басшылық мені жаңа өндіріс цехына ауыстырды. Мұндағы жұмыс толығымен автоматтандырылған. Күш-жігеріңді жұмсап, қатты шаршамайсын.  Бұл үлкен жетістік және мұндай инновациялық шешімдер еліміздің барлық аймақтарында біртіндеп енгізілуде. Елбасы әлемнің дамыған 30 елінің қатарына кіру міндетін қойды және біз осы мақсатта сенімді алға қадам басып келеміз», - деп А. Жаңабаев түйіндеді.