Білім және ғылым министрі елордалық балалар үйінің түлектерімен кездесті (ФОТО)

11 Шілде, 2014 14:00

Бүгін ҚР білім және ғылым министрі Аслан Сәрінжіпов елордалық балалар үйінің түлектерімен кездесті. Министр барлық талапкерлерді ұлттық біріңғай тестілеуді сәтті тапсырғанымен құттықтады.

«Мен сіздерді құттықтауға арнайы келдім. Біріншіден, көпшілігіңіз жақсы оқып, біріңғай тестілеуден жақсы балл жинадыңыздар. Бұл сіздердің өмірлеріңіздегі ең маңызды сәттеріңіздің бірі екені анық», - дейді еліміздің бас ұстазы.

Айта кету керек, биылғы жылы ҰБТ-ға балалар үйінің 103 түлегі қатысты. Соның ішінде 64-і өтпелі балл жинап, орташа көрсеткішпен 70 балл алды.

Министр сонымен қатар балаларды Астана күні мерекесімен де құттықтады. Сонымен қатар халықаралық кеңістіктегі ұлттық біріңғай тестілеудің маңызын атады.

«2050 Стратегиясында адам капиталына баса назар аударылған. Біз алдыңғы қатарлы 30-дыққа ену жолындағы мемлекет ретінде білім беруге ерекше назар аударуымыз қажет. Ол дегеніңіз білікті мамандар дайындау. Алдағы уақытта елдің міндеттері сіздердің мойындарыңызға жүктелетіні белгілі. Сіздердің білім деңгейлеріңіз болашақтағы елдің өмір сүруіне тікелей байланысты», - дейді министр.

Сонымен қатар құттықтау сөзінде бас ұстаз түлектермен емін-еркін әңгімелесіп, алдағы мақсаттарын да сұрады.

Түлектер өз кезегінде министрдің сұрақтарына шын ықыласпен жауап беріп, алдағы өздерінің мақсаттары туралы айтудан тартынбады.

Индира Қауметова

Фото Азамат Алиевтікі

теги:

детдом