• Басты
  • Назарбаев зияткерлік мектебінің оқушыларына «Туған елге тағзым» жобасы өткізілді

Назарбаев зияткерлік мектебінің оқушыларына «Туған елге тағзым» жобасы өткізілді

10 Шілде, 2014 16:02
2014 жылдың 1-10 шілдесі аралығында Назарбаев зияткерлік мектептері арасында «Туған елге тағзым» жобасы өткізілді. Бұл «Назарбаев зияткерлік мектебі» автономды білім беру ұйымының ұлттық тарихымыз бен мәдениетімізді зерттеуге бағытталған ең ірі жобаларының бірі боып табылатын зерттеу-өлкетану экспедициясы.

Бағыттармен алмасу жобаның басты ерекшеліктерінің бірі. Ол оқушыларға Қазақстанның құндылықтарын өз көздерімен көруге мүмкіндік береді. Шымкенттегі химия-биология бағытындағы Назарбаев зияткерлік мектебіне Павлодар мен Семейдің Назарбаев зияткерлік мектептерінің зерттеу-өлкетану экспедициясы келді. Жоба аясында экспедиция тобы тарапынан Оңтүстік Қазақстан облысы бойынша ағдар дайындалды. Семей қаласының оқушылары үшін «Тарихи өлке – Оңтүстік Қазақстан» тақырыбы ұсынылды. Павлодар қаласының тобына «Оңтүстік Қазақстан – бай мәдениет пен тарихтың орталығы» тақырыбы берілді, деп хабарлайды ОҚО әкімдігі.

10 күн ішінде жас ғалымдар жалпы облыстың табиғи-климаттық, тарихи-мәдени, ғылыми-оқыту және индустриялды ерекшеліктерімен танысты. Сонымен қатар олар зообақтарға, дендробақтарға барып жер бетінің өсімдік және жануар түрлеріне қанық болды. Және де облыстың ең ірі кәсіпкерліктері «Santo» фармацевтикалық зауыты мен «Petro Kazakstan» мұнай өңдеу зауытын аралады. Сол жерде олар дәрі-дәрмектің дайындалу жолымен танысты.

Сонымен қатар қатысушылар Отырар көне қаласына да табан тіремей кете алмады. Көне қаладағы археологиялық қазба байлықтарымен танысты. Жұмыс барысында балалар көне мешіттің жер астына көшіліп қалған үйіндісінің орнын зерттеді. Сонымен қатар қазіргі таңда қалпына келтірілген Арыстан баба, Қожа Ахмет Яссауи кесенелерін аралады. Музей мен универсиеттердегі мәдени-тарихи-этнографиялық орталықтар мен кітапханаларға барды.

«Мұндай шаралардың ұйымдастырылуы көптеген жетістікке қол жеткізуімізге жол ашады. Осы экспедициядан жиналған материалдар мектеп кітапханасына табысталып, келер жылғы мектеп оқушыларына оқулық құралы мен өзге де көмекші материалдар ретінде кәдеге асырылады. «туған елге тағзым» зерттеу-өлкетану экспедициясы үшінші жыл қатарынан өткізілуде», - делінген хабарламада. 

Барлық жаңалықтар