Астанада «Астана Bike» вело-sharing жүйесі ашылды

«Велотұрақтар – қазіргі заманның талабы. Бұл халықтың қажеттілігі. Қала өте қарқынды дамып келеді. Астанада қазір шамамен бір миллиондай адам бар. Тұрғындардың орташа жасы 30 жас. Жылына 25 мыңға дейін сәби дүниеге келеді. Бұның барлығы елордада балабақша құрылысынан бастап, мектеп пен осындай тұрақтарға дейін тиісті инфрақұрылымды дамытуды талап етеді. Велосипед қаланың әсемдігіне әсемдік қоса түсетін ерекше көлік құралы», - дейді әкім.

Әкімнің айтуынша, қалада жобаның бірінші кезеңін іске асыру аясында қазірдің өзінде 40 станция (200 велосипед) жұмыс істеп тұр. Станциялар сол жағалаудың орталық алаңында орналасқан.

«Әрине, мұнда ұйымдастырушылық мәселелер де жоқ емес. Ол дегеніңіз веложол салу, қауіпсіздік мәселелері, велосипед айдау мәдениеті. Кез келген өркениетті мемлекетте көлік жүргізушілері жаяу жүргіншілер мен велосипед айдаушыларға өте мұқият мән береді. Сол себепті бұл біздің қаламыздағы нормаға айналу керек. Жұмыстар енді басталып жатыр. Уақыт өте келе 1000 велосипедке 100 велотұрақ саламыз», - дейді қала басшысы.

Осылайша қала логистикасының өткізген алдын ала сараптамасы мен өзге де есептеулер бойынша станцияларды салудың ең оңтайлы кестесі дайындалды. Станциялардың орналасу ара қашықтығы 300-500 метрден аспайтын болады. «Астана Bike» заманауи жүйесі қала сұранысына қарай станциялардағы тұрақ орындары мен мобильді станциялардың орналасуына өзгерістер енгізуне мүмкіндік береді. Әр станция күн энергиясынан қуат алады. Сыртқы коммуникацияны талап етпейді.

Қауіпсіздік мәселесі басты назардан. Сол себепті Ішкі істер департаментімен бірлесіп «Абайлаңыз, велосипед» атты айлық жоспар дайындалды. Соның аясында қала тұрғындарына жол қозғалысы ережелері мен жолдағы велосипедке байланысты ережелер жан-жақты түсіндіріледі.

Айта кету керек, жобаны ұйымдастырушы «Самұрық-Қазына» Ұлттық әл-ауқат қоры» АҚ болып табылады. Өз кезегінде жобаны Астана әкімдігі мен Қазақстан Республикасы Спорт және дене шынықтыру агенттігі де қолдап отыр.

Мадина Нұрбекова