Астана – түрлі мәдени және архитектуралық идеялардың синтезі – К.Ақтаева (ВИДЕО)

«Астана әлемнің саяси картасында саяси ойлаудың жаңаша үлгісі ретінде орын алды. Тәуелсіздік сарайы, Президенттің «Ақ Орда» сарайы, «Бәйтерек» - мұның барлығы уақыт өте келе Кремль, Ақ үй мен Эйфель мұнарасымен аты теңдей аталатын ұлы сәулет өнерінің туындысына айналады. Біз қазіргі таңда еліміздің енді ғана аяққа тұрып келе жатқанын естен шығармауымыз керек, бір кездері біздің де әлемдік қуатты мемлекеттермен теңесеріміз анық», - дейді.

Оның айтуынша, 20 жыл ішінде біздің қарқынды дамуымыз бен ұстанған саяси бағытымыздың дұрыстығының арқасында Қазақстан мен Астана дегенде селт етпейтін, құрмет көрсетпейтін мемлекеттер кемде-кем.

«Астана туралы айтар кезде қаламыздың архитектуралық және мәдени озық шешімдердің синтезі екенін еске сала кеткім келеді. Біз Астана көшелерімен қыдыра жүріп, соның ішінде сол жағалаудағы сәулетті ғимараттар мен архитектуралық өнер туындыларын көргенде біз шағын ғана қаламыздан Біріккен Араб Әмірлігі, Малайзия, АҚШ, еуропа елдерінің қалаларына ұқсастыра салынған туындыларды көзіміз шалады. Бұл дегеніңіз Астананың батыс пен шығыстың сәулет өнерін бір бойына жинақтағанының белгісі», - дейді.

Оның айтуынша, Астана дүниетанымның жаңаша мәдени символы іспетті.

«Қазақстанның қазіргі халықаралық аренадағы ұстанған саяси бағытына зер салсақ, Астанамыздың әлемге ашылған бейбітшілік пен келісімнің жаңаша үлгісіндегі заманауи қала екеніне көзіміздің жетері анық», - дейді.

Мадина  Нұрбекова