Алматыда ОАЭАБ мүше елдерінің отырысы өтті
23 Маусым, 2014 12:19
Алматыда ҚР көлік және коммуникация вице-министрі Азат Бектұровтың төрағалығымен Орталық Азия экономикаларының БҰҰ арнайы бағдарламасының (ОАЭАБ) Көлік және шекаралардан өту жөніндегі Жобалық Жұмыс Тобының 19-шы отырысы өтті.
Талқылау барысында қатысушылар автомобиль, темір жол және ішкі су көлік салаларында басым жобалары, оның ішінде, «Батыс Еуропа – Батыс Қытай» халықаралық транзиттік дәлізі құрылысы, «Баку – Тбилиси – Карс» темір жол желісінің жобасы, «Гызылгая – Берекет – Этрек арқылы Өзен – Горган» темір жол желісінің жобасы және «Жезқазған – Бейнеу» жаңа темір жол маршрутының құрылыс жобасы атап өтілді, деп ведомствоның баспасөз қызметі хабарлады.
Соның ішінде халықаралық біріктірілген көлік-логистикалық жүйенің торабын қалыптастару мақсатында құрылған Құрғақ Порттар жөніндегі Үкіметаралық келісімге қатысу туралы ОАЭАБ-на мүше елдерінің қолдауы қажеттілігіне назар аударылды. Қазақстанның Келісімге қосылу процедурасы биыл жүзеге асырылатынын еске салынды.
